Chakswari, AJK: “President of Chakswari Traders Association, Muhammad Shafique Khawaja hold press conference”

چکسواری(نمائندہ پوٹھوار ڈاٹ کوم، ،اللہ دتہ بسمل ,04،اپریل,2023)—انجمن تاجراں چکسواری کے صدر محمد شفیق خواجہ،چودھری شبیر نگیال صدر انجمن تاجراں حمید آباد،سیکرٹری جنرل انجمن تاجراں چکسواری راجہ ساجد محمود نے پریس کانفرنس کرتے ہوئے کہا کہ انکم ٹیکس کا دفتر 2006میں قائم ہوا۔اس وقت اس دفتر کو قائم ہوئے سولہ سال ہو چکے ہیں۔سولہ سال بعد محکمہ کو کیا افتاد آ پڑی ہے کہ بغیر کوئی معقول وجہ بتائے اس آفس کو ڈڈیال شفٹ کیا جا رہا ہے۔ محکمہ انکم ٹیکس کے دفتر کو چکسواری سے کسی اور جگہ شفٹ نہیں ہونے دیں گے۔اگر ایسا ہوا تو چکسواری کی تاجر برادری شدید احتجاج کرے گی اورچکسواری کا کوئی تاجر ٹیکس جمع نہیں کروائے گا۔ہم سیکرٹری ریونیو اور چئیرمین CBRراجہ امجد پرویز سے مطالبہ کرتے ہیں کہ چکسواری آفس کو ڈڈیال شفٹ نہ کیا جائے۔تفصیلات کے مطابق انجمن تاجراں چکسواری کے سیکرٹری جنرل راجہ ساجد محمود نے کہا ہے کہ چکسواری میں موجود انکم ٹیکس آفس کو کسی صورت شفٹ نہیں ہونے دیں گے۔ جس وقت چکسواری میں میونسپل کمیٹی بھی نہ تھی اس وقت ٹیکس آفس بنایا گیا۔اب جب کہ چکسواری سے آٹھ سو سے زائدفائیلر ہیں اور دو ہزار سے زائد کیسززیرکار ہیں اس وقت اس دفتر کو شفٹ کرنا تاجروں کے ساتھ ظلم کے مترادف ہے۔ دنیا بھر میں ٹیکس ڈیپارٹمنٹ صارفین کو سہولتیں دیتا ہے تا کہ لوگ حکومت کو ٹیکس ادا کر سکیں۔لیکن ہمارے ادارے دنیا بھر کے نظام کے خلاف کام کرتے ہیں۔ ہمارے یہاں ٹیکس دینے والوں کو تکلیف دینا اپنا فریضہ سمجھا جاتا ہے۔کسی بھی تجارتی مرکزمیں تمام سرکاری محکمے تاجروں کو سہولیات دیتے ہیں تا کہ لوگ کاروبار کر سکیں ا ور پھر اس کاروبار سے ٹیکس وصول کرتے ہیں تا کہ ٹیکس کے پیسے سے عوام کو سہولیات دی جا سکیں۔محمد شفیق خواجہ نے احتجاج ریکارڈ کرواتے ہوئے کہا ہے کہ اگر چکسواری سے دفتر کو شفٹ کیا گیا تو ہم شدید احتجاج کریں گے۔انجمن تاجران حمید آباد چودھری شبیر نگیال نے کہا کہ محکمہ ریونیو کوئی معقول وجہ بتائے کہ چکسواری سے انکم ٹیکس آفس کو شفٹ کرنا کیوں ضروری ہے۔ بلا وجہ چکسواری کے آٹھ سو سے زائد صارفین کو میرپور یا ڈڈیال کی دوڑیں لگوانا کہاں کا انصاف ہے۔اگر کسی بھی وجہ سے دفتر کو شفٹ کرنے کی کوشش کی گئی تو روڈ بلاک کرنے سے لے کر ہر قسم کے احتجاج کا حق محفوظ رکھتے ہیں۔پہلی فرصت میں ٹیکس ہی جمع نہیں کروائیں گے۔ہماری آواز کو محکمہ ان لینڈ ریونیو سمجھیں اور عوام کو سہولیات فراہم کریں نہ کہ ان کو دور دراز دفاتر کے چکر لگوائیں جائیں۔چکسواری دفتر کو قائم رکھا جائے اور ٹیکس صارفین کو مزید سہولتیں دی جائیں۔ہم ٹیکس آفس کو بچانے کے لئے ہر فورم پر جائیں گے۔

Chakswari (Pothwar.com, Allah Ditta Bismill, 04, April 2023)- Representatives of the traders’ association in Chakswari, including its president Muhammad Shafiq Khawaja, Chaudhry Shabeer Ngyal, and Secretary-General Raja Sajid Mahmood, held a press conference today to express their concern over reports that the Inland Revenue office in Chakswari may be relocated. The office was established in 2006 and has been operating in the same location for 16 years. The traders’ association is worried that if the office is moved without a valid reason, it will cause unrest among traders, and they may refuse to pay taxes. They have requested the regional secretary and the Chairman of the Central Board of Revenue not to shift the office to another location. They argue that with over 800 taxpayers in the area, and more than 2,000 pending cases, relocating the office would be a grave injustice to the traders. They also point out that tax departments all over the world are meant to provide facilities to taxpayers, but in this case, the authorities are making things difficult for them.

چکسواری(نمائندہ پوٹھوار ڈاٹ کوم، ،اللہ دتہ بسمل ,04،اپریل,2023)—چکسواری بازار میں آتشزدگی کا ایک اور واقعہ۔ایک اور دکان جل کر خاکستر ہو گئی۔فائیر برگیڈ نہ ہونے کی بناء پر بر وقت پتہ لگ جانے کے باوجود دو گھنٹے بعد آگ پر قابو پایا جا سکا۔ مقامی لوگوں نے اپنی مدد آپ کے تحت آگ کو بجھایا ورنہ آگ پوری مارکیٹ کو اپنی لپیٹ میں لے سکتی تھی۔تاجر کا لاکھوں روپے کا نقصان۔ایک ہفتہ میں یہ دوسرا واقعہ ہے۔آزاد کشمیر حکومت تاجر کی مدد کرے۔تفصیلات کے مطابق روبی مارکیت میں موجود لیس، بکرم نلکیوں کی دکان میں جمعہ کی صبح تقریباًچھ بجے اچانک آگ بھڑک اٹھی۔کسی راہ گیر نے دھواں اٹھتا دیکھ کر مالکان کو فون کیا۔مارکیٹوں اور گردو نواح میں رہنے والے افراد موقع پر پہنچ گئے اور پانی کی ٹینکیاں منگوا کر آگ بجھانے کی وکششیں شروع کر دیں جو دو گھنٹے کے بعد بار آور ثابت ہوئیں اور یوں باقی دکانوں کو آگ لگنے سے بچایا جا سکا۔تھانہ پولیس چکسواری کے اہلکار بھی اطلاع ملتے ہی موقع پر پہنچ گئے اور مالک دکان کا بیان قلمبند کر لیا۔ دکاندار نے میڈیا سے گفتگو کرتے ہوئے کہا کہ میں نے بجلی کی جگہ سولر سسٹم لگایا ہوا ہے۔جب میں سولر سسٹم کو بند کر دیتا ہوں تو دکان سے بجلی مکمل طور پر بند ہو جاتی ہے۔ بارش کی وجہ سے بجلی رات دو بجے سے بند تھی۔ تاجر نے شک کا اظہار کرتے ہوئے کہا ہے کہ کسی نے جان بوجھ کر آگ لگائی ہے۔پو؛یس نے تفتیش شروع کر دی ہے۔ چکسواری میں ایک ہی ہفتے میں دکان میں آگ لگنے کا یہ دوسرا واقعہ ہے۔فائیر برگیڈ کی گاڑی موجود نہیں لیکن دو عدد فائیر مین تنخواہ لے رہے ہیں۔ گاڑی نہ ہونے کے باوجود فائیر مینوں کو بھرتی کر لیا گیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکسواری(نمائندہ پوٹھوار ڈاٹ کوم، ،اللہ دتہ بسمل ,04،اپریل,2023)— چکسواری بازار کی سڑک کا ٹینڈر ہونے کے باوجود ابھی تک کام شروع نہ ہو سکا۔دو سال قبل سابق وزیر اعظم آزاد کشمیر چودھری عبدالمجید نے مسلم لیگ ن کے دور میں ٹینڈر منظور کروایا تھا۔ مسلم لیگ ن کے بعد پی ٹی آئی کی حکومت آئے ڈیڑھ سال گزر گیا لیکن اس روڈ پر کام شروع نہ ہو سکا۔ پی ٹی آئی کی حکومت نے دو سال سے اس سڑک کی تعمیرکے لئے فنڈز ہی جاری نہیں کئے۔ٹھیکیدار کا کہنا ہے کہ اب ریٹ بڑھ چکے ہیں اس لئے میں پرانے ریٹ پر کام نہیں کروں گا ٹھیکہ ریوائز کیا جائے۔اب محکمہ شاہرات عامہ کے ایس ڈی او نے دورہ کیا اور کہا کہ موجود فنڈز میں اس سڑک کا کام نہیں ہو سکتا۔ اس فنڈز سے صرف پیچ ورک ہو سکتا ہے۔ دوسری جانب انجمن تاجراں نے شدیدتحفظات کا اظہار کرتے ہوئے احتجاج کی دھمکی دے دی ہے۔ تاجر برادری کا کہنا ہے کہ اگر محکمہ شاہرات عامہ نے پیچ ہی لگانے تھے تو دو سال قبل کیوں نہ لگائے۔ اس وقت سڑک کی حالت اتنی بری نہ تھی۔ اگر محکمہ شاہرات عامہ کے سیانے بابے چاہتے تو بہت کم پیسوں میں سڑک کو مرمت کر سکتے تھے۔ لیکن دو سال قبل اس سڑک کا ٹینڈر دے دیا گیا اب دو سال بعد پیچ نہیں لگانے دیں گے۔ محکمہ شاہرات سڑک کو نئے سرے سے تعمیر کرے ورنہ میرپور کوٹلی رڈود بلاک کر دیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکسواری(نمائندہ پوٹھوار ڈاٹ کوم، ،اللہ دتہ بسمل ,04،اپریل,2023)— کونسلر سفیان ایوب چودھری نے کہا ہے کہ پاکستان پیپلز پارٹی وفاق کی علامت جماعت ہے۔ پیپلز اپرٹی ہی عوامی امنگوں کو پورا کر سکتی ہے۔ شہید ذوالفقار علی بھٹو نے محکوم اور پسی ہوئی عوام کو قوت گویائی دی اور اپنے حق کے لئے بولنا سکھایا۔ شہید زوالفقار علی بھٹوکی جمہوریت اور حقیقی آزادی کے لئے بلند کی گئی آواز کو آمریت نے چپ کروانے کے لئے وارئے آئین کام کیا اور ایک منتخب عوامی نمائندے کو پھانسی کے گھاٹ چڑھا دیا۔آج پاکستان میں جمہوریت کے ثمرات شہید ذوالفقار علی بھٹو ہی کی دین ہیں۔آنے والا دور پاکستان پیپلز پارٹی کا ہے۔میونسپل کمیٹی سے ورکرز کی سیٹ پر منتخب ہونے والے کونسلر چودھری سفیان ایوب نے کہا ہے کہ چکسواری بازار کے مسائل حل کروانے کے لئے ہر ممکن کوشش کریں گے۔چکسواری بازار میں جتنے بھی ترقیاتی کام ہوئے ہیں وہ سابق وزیر اعظم چودھری عبدالمجید نے کروائے ہیں۔ موجودہ حکومت انتقامی کارروائیاں کر رہی ہے۔ دو سال قبل چکسواری بازار کی سڑک کا ٹینڈر منظور ہوا تھا لیکن اس کے فنڈز روک کر حکومت نے ثابت کر دیا کہ پی ٹی آئی تعمیر و ترقی کی دشمن ہے۔چودھری قاسم مجید ایم ایل اے نے حتی المقدورکوشش کی کہ کسی طرح چکسواری بازار کی مرکزی روڈ پر کام شروع ہو سکے لیکن موجودہ حکومت کے وزراء نے صرف اپنے حلقوں میں ہی کام کروا رہے ہیں چکسواری بازار کی مرکزی روڈ دیرینہ مسئلہ جان بوجھ کر حل نہیں کرنے دیا جا رہا۔ ایسے اوچھے ہتھکنڈوں سے عوامی مقبولیت ہر گز حاصل نہیں ہو سکتی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکسواری(نمائندہ پوٹھوار ڈاٹ کوم، ،اللہ دتہ بسمل ,04،اپریل,2023)—سابق ممبرضلع کونسل محمداکرم مغل ایڈووکیٹ کے بھائی اورٹھیکیدار حاجی محمدافضل مغل کے تایازاد بھائی اورصوفی محمدمطلوب حسین مغل کے بہنوئی اورطلعت افضل کے ماموں محمداکبرمغل کوبریڈفورڈبرطانیہ میں سپرد خاک کردیاگیا ہے جوقضائے الہی سے بریڈفورڈ برطانیہ میں وفات پاگئے تھے فاتحہ خوانی بریڈفورڈ کے علاوہ محمداکرم مغل مرحوم کی رہائش گاہ سیکٹرایف ون میرپور میں جاری ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چکسواری(نمائندہ پوٹھوار ڈاٹ کوم، ،اللہ دتہ بسمل ,04،اپریل,2023)—ایم ڈی ایچ اے لوگوں کو سہولیات دینے کی بجائے کرپشن کا گڑھ بن گیا۔نیو ٹاؤنز میں بنیادی سہولتوں کا فقدان۔سیوریج کی لائنیں بند ہو چکی ہیں۔پانی کے مسائل بد ستور موجود،کمرشل ایریا کی نشاندہی نہ ہو سکی۔ لوگوں نے رہائشی علاقوں میں دکانین بنا لیں۔نیو ٹاؤنز میں تفریحی پارک نہ بن سکے۔ایم ڈی ایچ اے نیو ٹاؤنز میں متاثرین منگلا ڈیم کو سہولیات دینے سے قاصر۔ایم ڈی ایچ اے کا احتساب کون کرے گا؟تفصیلات کے مطابق چکسواری سمیت ڈڈیال اور اسلام گڑھ کے نیو ٹاؤنز میں متاثرین منگلا ڈیم دس سال گزر جانے کے باوجود ابھی تک بنیادی سہلوتوں سے محروم ہیں۔ ناقص کام ہونے کی وجہ سے بعض جگہوں پر سیوریج لائنیں تباہ ہو چکی ہیں۔واٹر سپلائیوں کے مسائل بھی جوں کے توں موجود ہیں۔دس سا ل گزر جانے کے باوجود ابھی تک پارک کے رقبے کی نشاندہی نہ ہو سکی اور نہ ہی گرین بیلیٹ پر پودے لگوائے جا سکے۔ نیو ٹاؤن چکسواری میں موجود گرین بیلیٹ پر نیو ٹاؤن کے مکینوں نے اپنی مدد آپ کے تحت پودے لگوائے جن کی دیکھ بھال بھی ایم ڈی ایچ اے کے ملازمین نہیں کرتے۔کمیونٹی ہال مکمل نہ ہوسکا۔بوائز اینڈ گرلز ہائیر سیکنڈری سکولز کی عمارتیں ابھی تک نا مکمل ہیں۔ٹھیکیداروں کا احتساب نہ ہو سکا۔ہر نئی حکومت احتساب کا نعرہ ضرور لگاتی ہے لیکن عملی طور پر آج تک کوئی بھی ذمہ دار تعین نہ ہو سکا۔ایم ڈی ایچ کا سالانہ بجٹ کہاں خرچ کیا جا رہا ہے کسی کو کچھ معلوم نہیں۔ایم ڈی ایچ اے میں ہونے والی کرپشن کا حساب کون لے گا؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکسواری(نمائندہ پوٹھوار ڈاٹ کوم، ،اللہ دتہ بسمل ,04،اپریل,2023)—پاکستان تحریک انصاف کے مرکزی رہنما و صدر ریاست کے اعزازی مشیر بیرسٹر کرامت حسین نے کہا ہے کہ مسئلہ کشمیر کو دنیا بھر میں اجاگر کرنے کا سہرہ بیرسٹر سلطان محمود چودھری کے سر جاتا۔بیرسٹر سلطان محمود چودھری نے مسئلہ کشمیر کو دنیا کے ہر کونے میں پہنچایا۔جتنے دور ے صدر ریاست نے کئے شاید ہی کسی کشمیری رہنما نے کئے ہوں۔صدر ریاست نے ہمیشہ میرپور کے حقوق کی آواز بلند کی ہے۔ صدر کشمیر بنتے ہی بیرسٹر سلطان محمود چودھری نے متاثرین منگلا ڈیم نے دیرینہ مسئلہ حل کروا دیا۔ اضافیکنبہ جات کے لئے میرپور میں رقبہ ایکوائر کروانے کیلئے بجٹ میں فنڈز رکھوائے۔ رٹھوعہ ہریام پل کی تکمیل کے لئے عملی کوششیں کیں۔انھوں نے مزید کہا کہ مسئلہ کشمیر حل کئے بناء جنوبی ایشیا میں پائیدار امن قائم نہیں ہو سکتا۔دو ایٹمی طاقتوں کے درمیان ایک ہاٹ ایشو کو اقوام متحدہ کی قرار دادوں کے مطابق حل کروانے کے لئے عالمی طاقتیں اپنا کردار ادا کریں۔پاکستان تحریک انصاف نے کشمیریوں کے مسئلہ کو صحیح معنوں میں اجاگر کیاہے۔ان خیالات کا اظہار بیرسٹر کرامت حسین چودھری نے چکسواری پریس کلب میں میڈیا سے گفتگو کرتے ہوئے کیا۔انھوں نے مزید کہا کہ بیرسٹر سلطان محمود چودھری کی ولولہ خیز قیادت کی وجہ سے تحریک انصاف نے میر پور کارپوریشن میں اپنا مئیر بنایا ہے۔آزاد کشمیر بھر میں تحریک انصاف کی جیت میں بیرسٹر سلطان محمود چودھری نے اہم کردار ادا کیا۔بیرسٹر سلطان محمود چودھری آزاد کشمیر کے عوام کے دلوں میں بستے ہیں۔ضلع میرپور آج بھی بیرسٹر سلطان محمود چودھری کے چاہنے والوں کا گڑھ ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چکسواری(نمائندہ پوٹھوار ڈاٹ کوم، ،اللہ دتہ بسمل ,04،اپریل,2023)—انجمن تاجراں کے سیکرٹری جنرل راجہ ساجد محمود،سابق صدرچکسواری پریس کلب راجہ نثار احمدنے چودھری نعم حسین روپیال کو چیئرمین میونسپل کمیٹی چکسواری اور حاجی تاسب حسین چودھری کو ڈپٹی چیئرمین منتخب ہونے اور چارج سنبھالنے پر ان کے دفتر جا کر ان کو مبارکباد دی۔اس موقع پرراجہ ساجد محمود نے چکسواری بازار کے مسائل کے حوالے سے نشاندہی کی اور ان مسائل کو حل کروانے کی درخواست کی۔چیئرمین میونسپل کمیٹی چکسواری چودھری نعیم حسین روپیال نے کہا کہ جس دن سے چارج سنبھالا ہے تمام مسائل پر نظر ہے۔فنڈز کی کمی کی وجہ سے بعض مسائل کچھ وقت لیں گے لیکن جن پر فوری ایکشن ہو سکتا ہے ان پر کام جاری ہے۔ہم نے اپنی پہلی میٹنگ میں اپنے 11وارڈز کے کونسلر کا اجلاس بلایا ہے اور ان سب سے رائے لی۔سب سے پہلے چکسواری بازار کی بہتری کیلئے اقدامات اٹھائیں گے۔چکسواری بازار کا سب سے بڑا مسئلہ واٹر سپلائی کا مسئلہ ہے اور دوسرا بڑا مسئلہ سڑک کی تعمیر کا ہے۔عیدکے فوراً بعد سڑک پر پیچ ورک لگایا جائے گا۔تاجر برادری تعاون کرے ان شاء اللہ چکسواری بازار کو مثالی بازار بنائیں گے۔ جو کام میرے اختیار میں ہیں ان کو حل کروانا میرا فرض ہے۔راجہ ساجد محمود نے کہا کہ آپ ایک اچھے خاندان سے ہیں اور پہلے منتخب ایڈمنسٹریٹر بنے ہیں۔ ہمیں آپ سے بڑی امیدیں ہیں۔بڑوٹیاں گاؤں کی مین روڈ بھی ٹوٹ پھوٹ چکی ہے۔چکسواری بازار میں پبلک ٹائلٹس اور دیگر مسائل کو حل کروانے میں اپنا کردار ادا کریں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکسواری(نمائندہ پوٹھوار ڈاٹ کوم، ،اللہ دتہ بسمل ,04،اپریل,2023)—مرکزی انجمن تاجراں چکسواری کے نمائندہ وفد نے چیئرمین میونسپل کمیٹی چکسواری چودھری نعیم حسین چودھری اور ڈپٹی چیئرمین حاجی تاسب حسین چودھری کوڈپٹی چئیرمین منتخب ہونے پر صدر مرکزی انجمن تاجراں منیر حسین سیٹھی کی قیادت میں مبارکباد پیش کی۔ان کے ہمراہ سینئر نائب صدر راجہ عبدالعزیز،سیکرٹری جنرل حاجی اورنگذیب چودھری،نائب صدر قاضی عبدالقدیر،نائب صدر حاجی شفیق الرحمان،حاجی رحمت علی،کشمیر خان،حاجی محمد حنیف،حاجی عبدالرؤف،ارشد محمود،محمد علی بھٹی،چودھری امجد،قاضی اللہ دتہ اور محمد تاج بھی موجود تھے۔وفد نے نو منتخب چئیرمین میونسپل کمیٹی چکسواری نعیم حسین روپیال کے لئے نیک خواہشات کا اظہار کیا۔انھوں نے کہا کہ ہم امید کرتے ہیں کہ چودھری نعیم حسین روپیال اپنے بڑے بھائی کے نقش قدم پر چلتے ہوئے عوام علاقہ کی خدمت کاسفر جاری رکھیں گے۔چودھری نعیم حسین روپیال نے تاجروں کے وفد کو یقین دلایا کہ چکسواری بازار کی بہتری کے ہم ممکن اقدام اٹھائیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکسواری(نمائندہ پوٹھوار ڈاٹ کوم، ،اللہ دتہ بسمل ,04،اپریل,2023)—ماہ مقدس میں چکسواری بازار میں بھکاریوں کی بھر مار۔بھاکریوں نے انت مچا رکھی ہے۔ خریداری کرنے والے صارفین کم اور بھکاری زیادہ ہیں۔بھکاریوں کی بڑی تعداد نے مختلف علاقوں سے چکسواری کا رخ کیا ہوا ہے۔بھکاری مرد اورعورتیں نے چکسواری ازار کے داخلی دروازوں پر ڈیرے ڈال رکھے ہیں۔ باقی بچ جانے والے بھکاری دکانوں میں گھس جاتے ہیں اور صارفین کو بے جا تنگ کرتے ہیں۔انتظامیہ بے بس۔کچھ دن قبل چند بھکاریوں کو چکسواری پولیس نے گرفتار کیا تھا لیکن دوسرے دن ہی وہ بھکاری ضمانت پر رہا ہو کر چکسواری بازار میں کھڑے ہو کر تاجروں کا منہ چڑا رہے تھے۔عید کی آمد آمد ہے چکسواری بازار میں خریداری کرنے والوں کا رش بڑھتا جا رہا ہے ایسے میں بھکاریوں انت مچا رکھی ہے اور بظاہر ہماری انتظامیہ ان کے سامنے بے بس نظر آتی ہے۔تاجروں نے چکسواری بازار کی تاجر برادری نے انتظامیہ سے اپیل کرتے ہوئے کہا ہے کہ ان بھکاریوں کے ساتھ سخت رویہ اپنایا جائے اور انھیں ضلع بدر کیا جائے اور دوبارہ ان کو ضلع میرپور میں داخل ہی نہ ہونے دیا جائے۔تاجرو ں کو پیشہ ور بھکاریوں سے نجات دلائی جائے۔