Kahuta; Mator Super League Season 3 Concludes with Grand Ceremony

مٹور (نمائندہ پوٹھوار ڈاٹ کوم کبیر احمد جنجوعہ،21ستمبر2026)
مٹور سپر لیگ سیزن 3 کی شاندار اختتامی تقریب، بیرسٹر احمد صغیر راجہ کی بطور مہمان خصوصی شرکت،اختتامی تقریب میں نوجوان ن لیگی رہنماء راجہ اکرام جنجوعہ آف کلر سیداں،راجہ شعبان تھوہاراجگان،راجہ اویس منیر مٹور، راجہ اکرام جنجوعہ مٹور ون نے بھی شرکت کی، تفصیل کے مطابق مٹور سپر لیگ سیزن 3 کرکٹ ٹورنامنٹ کی شاندار اختتامی تقریب منعقد ہوئی، جس میں امیدوار برائے ایم پی اے حلقہ پی پی 7 بیرسٹر احمد صغیر راجہ نے بطور مہمان خصوصی شرکت کی۔ اختتامی تقریب کے موقع پر انہوں نے وننگ ٹیم کو ٹرافی اور نقد انعام پیش کیا اور کھلاڑیوں کی بہترین کارکردگی کو سراہا اس موقع پر اظہارِ خیال کرتے ہوئے بیرسٹر احمد صغیر راجہ نے کہا کہ نوجوان ہمارے معاشرے کا قیمتی سرمایہ ہیں اور کھیلوں کے فروغ سے نوجوانوں کو مثبت سرگرمیوں کی طرف راغب کیا جا سکتا ہے۔ انہوں نے کہا کہ کھیل کود سے جسمانی نشوونما کے ساتھ ساتھ نظم و ضبط، باہمی تعاون اور ٹیم ورک کا جذبہ بھی پروان چڑھتا ہے۔ بیرسٹر احمد صغیر راجہ نے کہا کہ وہ کھلاڑیوں کی حوصلہ افزائی کے لیے ہر وقت حاضر ہیں اور نوجوانوں کو کھیلوں کے بہتر مواقع فراہم کرنے کے لیے اپنی بھرپور کوششیں جاری رکھیں گے۔ انہوں نے مزید یقین دہانی کروائی کہ مٹور گراؤنڈ کی مرمت کے حوالے سے کام جاری ہے اور جلد ہی گراؤنڈ کی مرمت و بحالی پر عملی کام شروع کر دیا جائے گا تاکہ نوجوانوں کو کھیلوں کے لیے بہتر سہولیات میسر آ سکیں۔ انہوں نے مٹور سپر لیگ سیزن 3 کے کامیاب انعقاد پر انتظامیہ کمیٹی کو مبارکباد پیش کرتے ہوئے کہا کہ ٹورنامنٹ کے انعقاد سے نوجوان کھلاڑیوں کو اپنی صلاحیتیں اجاگر کرنے کا موقع ملا۔ انہوں نے منتظمین کی کاوشوں کو سراہتے ہوئے امید ظاہر کی کہ مستقبل میں بھی اس طرح کے کھیلوں کے مقابلوں کا سلسلہ جاری رہے گا۔ اختتامی تقریب میں کھلاڑیوں، منتظمین اور شائقینِ کرکٹ کی بڑی تعداد نے شرکت کی، جبکہ وننگ ٹیم کو ٹرافی اور نقد انعام ملنے پر کھلاڑیوں میں خوشی کی لہر دوڑ گئی۔

Mator (Pothwar.com, Kabir Ahmed Janjua, September 21, 2026): The closing ceremony of Motur Super League Season 3 was held with Barrister Ahmed Sagheer Raja as the chief guest. Young PML-N leaders Raja Ikram Janjua of Kallar Syedan, Raja Shaban Thoha Rajgan, Raja Owais Munir Mator and Raja Ikram Janjua Mator also attended the event.

Barrister Ahmed Sagheer Raja presented the winning team with a trophy and cash prize and praised the players for their performance. He said sports can encourage young people to participate in positive activities while promoting discipline, teamwork and cooperation.

He also said work related to the repair and restoration of Mator Ground was underway and assured that practical work would begin soon. He congratulated the organisers on the successful tournament and appreciated their efforts to promote cricket among local youth.

الخلیل عمرہ گروپ کے زائرین کی مکہ مکرمہ میں زیارات، مسجد عائشہؓ سے دوبارہ عمرہ ادا کیا

Al-Khalil Umrah Group Pilgrims Visit Holy Sites in Makkah, Perform Second Umrah

مٹور (نمائندہ پوٹھوار ڈاٹ کوم کبیر احمد جنجوعہ،21ستمبر2026)
الخلیل عمرہ گروپ گرڈ اسٹیشن کہوٹہ کے زائرین کی مکہ مکرمہ میں زیارات، مسجد عائشہؓ سے احرام باندھ کر دوبارہ عمرہ کی سعادت حاصل تفصیل کے مطابق الخلیل عمرہ گروپ گرڈ اسٹیشن کہوٹہ سے گئے ہوئے عمرہ زائرین نے انچارج و نگران صاحبزادہ محمد فرید کی قیادت میں مکہ مکرمہ میں مختلف مقدس و تاریخی مقامات کی زیارات کیں اور روحانی و ایمانی کیفیت میں وقت گزارا۔ اس موقع پر عمرہ زائرین نے مکہ مکرمہ کے مختلف مقدس مقامات کی زیارت کا شرف حاصل کیا۔ بعد ازاں زائرین مسجد عائشہؓ (تنعیم) پہنچے، جہاں سے احرام باندھ کر دوبارہ عمرہ کی نیت کی اور بیت اللہ شریف پہنچ کر عمرہ ادا کرنے کی سعادت حاصل کی۔ عمرہ زائرین نے اللہ تعالیٰ کا شکر ادا کرتے ہوئے اپنے ملک، عزیز و اقارب، دوست احباب اور تمام امتِ مسلمہ کے لیے خصوصی دعائیں کیں۔ اس موقع پر صاحبزادہ محمد فرید نے زائرین کی رہنمائی کرتے ہوئے مناسکِ عمرہ کی ادائیگی میں معاونت کی اور انہیں حرمین شریفین کی زیارت کی اہمیت اور آداب سے بھی آگاہ کیا۔ عمرہ زائرین نے کہا کہ مکہ مکرمہ میں حاضری اور بیت اللہ شریف کا دیدار ہر مسلمان کے لیے انتہائی سعادت اور روحانی سکون کا باعث ہے۔ انہوں نے دعا کی کہ اللہ تعالیٰ تمام مسلمانوں کو حرمین شریفین کی حاضری نصیب فرمائے اور ان کی عبادات کو اپنی بارگاہ میں قبول فرمائے۔

Rulers Should Cut Their Own Expenses Instead of Imposing Smart Lockdowns, Says Malik Abdul Qayyum Awan

حکمران سمارٹ لاک ڈاؤن کے بجائے اپنے اخراجات کم کریں، ملک عبدالقیوم اعوان

مٹور (نمائندہ پوٹھوار ڈاٹ کوم کبیر احمد جنجوعہ،21ستمبر2026)
حکمران سمارٹ لاک ڈاؤن کے بجائے اپنے اخراجات کم کریں، ملک عبدالقیوم اعوان، تفصیل کے مطابق جماعت اسلامی یوتھ ونگ تحصیل کہوٹہ کے صدر ملک عبدالقیوم اعوان نے کہا ہے کہ حکمران عوام پر سمارٹ لاک ڈاؤن یا دیگر پابندیاں عائد کرنے کے بجائے سب سے پہلے اپنے ذاتی اور سرکاری اخراجات میں کمی لائیں۔ انہوں نے کہا کہ موجودہ حالات میں مہنگائی اور معاشی مشکلات سے دوچار عوام پر مزید بوجھ ڈالنے کے بجائے حکمران طبقے کو کفایت شعاری کا عملی مظاہرہ کرنا چاہیے۔ ملک عبدالقیوم اعوان نے کہا کہ وزیر، مشیر اور اعلیٰ سرکاری عہدوں پر فائز شخصیات کے اخراجات میں کمی کیے بغیر عوام سے قربانی کا مطالبہ مناسب نہیں۔ ان کے بقول عوام پہلے ہی ٹیکسوں، مہنگائی اور روزمرہ اخراجات کے دباؤ کا سامنا کر رہے ہیں، اس لیے حکومت کو ایسی پالیسیوں پر توجہ دینی چاہیے جن سے عام آدمی کی مشکلات کم ہوں۔ انہوں نے کہا کہ حکمران اگر واقعی ملکی معیشت کو درپیش مسائل کا مقابلہ کرنا چاہتے ہیں تو غیر ضروری سرکاری اخراجات، پروٹوکول، سرکاری گاڑیوں کے استعمال اور دیگر مراعات میں کمی کے لیے مؤثر اقدامات کریں۔ حالیہ دنوں میں حکومت نے سرکاری گاڑیوں کے ایندھن کے استعمال، نئی گاڑیوں کی خریداری، غیر ضروری بیرونِ ملک دوروں اور سرکاری تقریبات سے متعلق بعض کفایتی اقدامات کا اعلان بھی کیا ہے۔ ملک عبدالقیوم اعوان نے مزید کہا کہ عوامی مشکلات کا حل ایسے اقدامات میں ہے جن سے معیشت مضبوط ہو، روزگار کے مواقع پیدا ہوں اور عام شہری کو ریلیف ملے۔ انہوں نے مطالبہ کیا کہ حکمران عوام کو مشکلات میں مبتلا کرنے کے بجائے اپنے اخراجات کم کرنے اور حکومتی وسائل کے مؤثر استعمال کو یقینی بنانے پر توجہ دیں۔

Public Service Is My Mission, I Will Serve the People If Elected, Says Mirza Muhammad Masood

عوام کی خدمت میرا مشن ہے، الیکشن میں کامیاب ہو کر عوام کا خادم بنوں گا، مرزا محمد مسعود

مٹور (نمائندہ پوٹھوار ڈاٹ کوم کبیر احمد جنجوعہ،21ستمبر2026)
عوام کی خدمت میرا مشن ہے، الیکشن میں کامیاب ہو کر عوام کا خادم بنوں گا، مرزا محمد مسعود،تفصیل کے مطابق معروف سیاسی و سماجی شخصیت اور سابق وائس چیئرمین مرزا محمد مسعود نے اپنے ایک بیان میں کہا ہے کہ الیکشن میں کامیابی حاصل کرنے کے بعد عوام کا خادم بن کر خدمت کروں گا۔ میری ہمیشہ سے کوشش رہی ہے کہ اپنی یونین کونسل کے عوام کے مسائل کو ترجیحی بنیادوں پر حل کرنے کے لیے اپنا کردار ادا کروں، اور انشاء اللہ آئندہ بھی عوامی خدمت کا یہ سلسلہ جاری رکھوں گا۔ انہوں نے کہا کہ اپنی یوسی کے عوام نے ہمیشہ مجھ پر اعتماد کیا ہے اور میں نے بھی عوام کو کبھی مایوس نہیں کیا۔ عوام کی محبت، اعتماد اور تعاون میرے لیے قیمتی سرمایہ ہے۔ انشاء اللہ اگر عوام نے دوبارہ خدمت کا موقع دیا تو ان کے اعتماد پر پورا اترنے کی بھرپور کوشش کروں گا۔ مرزا محمد مسعود نے مزید کہا کہ عوامی مسائل کا حل، علاقے کی ترقی اور بنیادی سہولیات کی فراہمی میری اولین ترجیحات میں شامل ہیں۔ سیاست کو ذاتی مفادات کے بجائے عوام کی خدمت کا ذریعہ سمجھتا ہوں اور عوام کے درمیان رہ کر ان کے مسائل سے آگاہی حاصل کرنا اور ان کے حل کے لیے آواز بلند کرنا اپنا فرض سمجھتا ہوں۔ انہوں نے کہا کہ آنے والے وقت میں بھی اپنی یوسی کے عوام کے ساتھ کھڑا رہوں گا اور ان کے حقوق اور مسائل کے حل کے لیے ہر ممکن کردار ادا کروں گا۔ مجھے امید ہے کہ عوام ماضی کی طرح آئندہ بھی اپنے اعتماد اور تعاون سے نوازیں گے۔

Raja Usama Ashfaq and Raja Sagheer Ahmed Visit Thoha Khalsa RHC, Direct Steps to Improve Healthcare Facilities

راجہ اسامہ اشفاق اور راجہ صغیر احمد کا تھوہا خالصہ آر ایچ سی کا دورہ، طبی سہولیات بہتر بنانے کی ہدایت

مٹور (نمائندہ پوٹھوار ڈاٹ کوم کبیر احمد جنجوعہ،21ستمبر2026)
ممبران اسمبلی راجہ اسامہ اشفاق اور راجہ صغیر احمدکا تھوہا خالصہ آر ایچ سی کا دورہ، طبی سہولیات کی فراہمی کے لیے اقدامات کی ہدایت، تفصیل کے مطابق مسلم لیگ ن کی نوجوان قیادت اور امیدوار برائے چیئرمین یونین کونسل مٹور راجہ عرفان سرور کی درخواست پر مسلم لیگ ن کے رکن قومی اسمبلی راجہ اسامہ اشفاق سرور اور رکن پنجاب اسمبلی راجہ صغیر احمد نے تھوہا خالصہ رورل ہیلتھ سنٹر (RHC) کا دورہ کیا۔ اس موقع پر راجہ عرفان سرور نے معزز مہمانوں کو ہسپتال کے مختلف شعبہ جات کا دورہ کرایا اور انہیں اہل علاقہ کو درپیش طبی مسائل اور ہسپتال میں موجود سہولیات کے حوالے سے تفصیلی آگاہ کیا۔ راجہ عرفان سرور نے بتایا کہ تھوہا خالصہ اور گردونواح کے عوام بڑی تعداد میں اس بنیادی مرکز صحت سے استفادہ کرتے ہیں، تاہم بعض طبی سہولیات کی عدم دستیابی کے باعث مریضوں کو مشکلات کا سامنا کرنا پڑتا ہے اور انہیں معمولی نوعیت کے طبی معائنے اور ٹیسٹوں کے لیے بھی دیگر مراکز صحت کا رخ کرنا پڑتا ہے۔ اس موقع پر رکن قومی اسمبلی راجہ اسامہ اشفاق سرور اور رکن پنجاب اسمبلی راجہ صغیر احمد نے ہسپتال انتظامیہ اور متعلقہ محکمہ کے حکام سے مسائل کے حوالے سے معلومات حاصل کیں اور متعلقہ حکام کو ہدایت کی کہ اہل علاقہ کو درپیش مسائل کے حل اور بنیادی طبی سہولیات کی فراہمی کے لیے عملی اقدامات کیے جائیں تاکہ عوام کو ان کی دہلیز پر بہتر طبی سہولیات میسر آسکیں۔ محکمہ صحت کے حکام نے اس موقع پر بتایا کہ تھوہا خالصہ آر ایچ سی میں ایکس رے کی سہولت فعال ہو چکی ہے جبکہ جلد ہی لیبارٹری کی سہولیات بھی فراہم کر دی جائیں گی۔ حکام نے مزید بتایا کہ خواتین کے لیے گائنی ڈاکٹر کی سہولت بھی جلد میسر کرنے کے لیے اقدامات کیے جا رہے ہیں۔ راجہ عرفان سرور نے رکن قومی اسمبلی راجہ اسامہ اشفاق سرور اور رکن پنجاب اسمبلی راجہ صغیر احمد کا شکریہ ادا کرتے ہوئے کہا کہ علاقے کے عوام کو بنیادی اور معیاری صحت کی سہولیات کی فراہمی وقت کی اہم ضرورت ہے۔ انہوں نے امید ظاہر کی کہ متعلقہ محکمہ کی جانب سے کیے جانے والے اقدامات سے تھوہا خالصہ اور گردونواح کے عوام کو علاج معالجے کی بہتر سہولیات میسر ہوں گی اور انہیں معمولی طبی ضروریات کے لیے دور دراز علاقوں کا رخ نہیں کرنا پڑے گا۔